Լոնդոնում սահմանվել է նոր համաշխարհային ռեկորդ․ աշխարհի ամենաերկար տիրամիսուն այժմ ունի 440.6 մետր երկարություն՝ գերազանցելով Միլանում սահմանված նախկին 273.5 մետրանոց ցուցանիշը։
Շաբաթ և կիրակի օրերին Չելսիի քաղաքապետարանի շենքում հավաքվել էին 100 իտալացի խոհարարներ, որոնք միասին պատրաստել են հսկայական աղանդերը՝ հետևելով Գինեսի ռեկորդների բոլոր կանոններին։ Տիրամիսուն պատրաստվել և հավաքվել է ուղիղ տեղում՝ օգտագործելով մոտ 150 հազար սավոյարդի թխվածքաբլիթ և 20 հազար ձու։
Նախագծի հեղինակ Միրկո Ռիչին նշել է, որ տիրամիսուն Իտալիայի ամենահրաշալի արտահանումներից մեկն է, իսկ միջոցառումը Մեծ Բրիտանիայում կազմակերպվել է որպես շնորհակալություն Միացյալ Թագավորությանը։ Նրա խոսքով՝ այս յուրահատուկ աղանդերը նաև նվիրված էր թագավորին և թագավորական ընտանիքին, ինչի խորհրդանիշն էր վերևում տեղադրված ոսկեգույն թագը։ Խոհարար Կարմելո Կարնևալեն բացահայտել է նաև կատարյալ տիրամիսուի գաղտնիքը՝ բարձրորակ սուրճ, խիտ ու նուրբ կրեմ և մեծ կիրք։
Այս քաղցր ռեկորդը ոչ միայն նոր հաղթանակ էր իտալական խոհարարության համար, այլ նաև մշակութային յուրօրինակ ժեստ՝ միավորելով իտալական ավանդույթներն ու բրիտանական թագավորական շուքը։