Blue Origin-ը իրականացրել է իր New Glenn հրթիռի երրորդ փորձնական արձակումը, որը մասամբ հաջողությամբ է ավարտվել, սակայն հիմնական բեռնատար արբանյակը հայտնվել է սխալ ուղեծրում։ Արձակումը կատարվել է ապրիլի 19-ին։ Հրթիռի առաջին աստիճանը հաջողությամբ վերադարձվել է Ատլանտյան օվկիանոսում գտնվող վայրէջքային հարթակ։ Սակայն հետագայում պարզվել է, որ AST SpaceMobile ընկերության BlueBird 7 արբանյակը դուրս է բերվել նախատեսվածից ավելի ցածր ուղեծիր։

Չնայած արբանյակը ակտիվացել է և գործարկել իր համակարգերը, նրա բարձրությունը բավարար չէ կայուն աշխատանք ապահովելու համար։ Ընկերությունը հայտարարել է, որ այդ պատճառով արբանյակը չի կարող շարունակել իր առաքելությունը և պետք է դուրս բերվի ուղեծրից (deorbit)։ Միաժամանակ նշվել է, որ արբանյակի արժեքը կփոխհատուցվի ապահովագրության միջոցով։ BlueBird 7-ը նախատեսված էր լինել աշխարհի ամենամեծ կապի արբանյակային ցանցի մաս՝ ապահովելով ուղիղ կապ բջջային հեռախոսների համար տիեզերքից։