Պակիստանի իշխանությունները պատրաստվում են հյուրընկալել Իրանի և Միացյալ Նահանգների միջև բանակցությունների երկրորդ փուլը՝ ի հեճուկս քննարկումների, թե արդյոք առհասարակ բանակցությունները տեղի կունենան, թե ոչ։
Անանուն աղբյուրները Associated Press-ին հայտնել են, որ Պակիստանը կիրակի օրվանից ի վեր ակտիվացրել է դիվանագիտական կապերը Վաշինգտոնի և Թեհրանի հետ, որպեսզի բանակցություններն ապրիլի 21-ին շարունակվեն։
Պակիստանի վարչապետի գրասենյակից հայտնել են, որ վարչապետ Շեհբազ Շարիֆը ապրիլի 19-ի երեկոյան հեռախոսազրույց է ունեցել Իրանի նախագահ Մասուդ Փեզեշքիանի հետ։
Երկրում սկսել են փակել հիմնական ճանապարհները և ուժեղացնել անվտանգությունը մայրաքաղաք Իսլամաբադում, մասնավորապես՝ այն հյուրանոցի շուրջ, որտեղ նախատեսվում է պատվիրակությունների հնարավոր հանդիպումը։
Իշխանությունները զորքեր են տեղակայել անցակետերում, փակել զբոսաշրջային վայրերը և հրահանգել խոշոր հյուրանոցներին սահմանափակել ամրագրումները։
Պակիստանի ներքին գործերի նախարար Մոհսին Նաքվին ապրիլի 20-ին Իսլամաբադում ԱՄՆ դեսպանատանը հանդիպել է ԱՄՆ գործերի ժամանակավոր հավատարմատար Նատալի Բեյքերի հետ։ Ի թիվս այլ հարցերի՝ քննարկվել է նաև ԱՄՆ-Իրան բանակցությունների հարցը։ Նաքվին Բեյքերին տեղեկացրել է անվտանգության միջոցառումների մասին՝ նշելով, որ հատուկ միջոցառումներ են ձեռնարկվել այցելող պատվիրակությունների անվտանգությունն ապահովելու համար։