«Կրթությունը նորաձև է բոլոր ժամանակներում»․ այս համոզմանն է Լոռու մարզի Սպիտակ քաղաքի 55-ամյա բնակիչ Նաիրա Մաթոսյանը։
Մի քանի մասնագիտություն ունենալով և տարբեր ոլորտներում աշխատելով՝ նա իր օրինակով ցույց է տալիս՝ տարիքը պատնեշ և խոչընդոտ չէ կրթություն ստանալու կամ այն շարունակելու համար։
Երևանի պետական տնտեսական ինստիտուտ, հայ-բրիտանական բիզնես դպրոց, ձեռներեցների դպրոց, ներդրումային դրամաշնորհների կուրսեր, կրիպտոարժույթների և ներդրումների վերաբերյալ կուրս․ սա է նրա անցած կրթական ճանապարհը։ Այժմ էլ Նաիրան որոշել է մասնակցել «Կրթվելը նորաձև է» շարժման ընթացքում անցկացվող դասընթացներին և հանդիպումներին։
«Մշտապես կրթվելու ցանկություն եմ ունեցել։ Հիմա աշխատում եմ առողջապահական ոլորտում որպես գլխավոր հաշվապահ։ Ունեմ բավականին մեծ փորձ տարբեր ոլորտներում»,- «Հայկական ժամանակ»-ի հետ զրույցում ասում է նա։
«Կրթվելը նորաձև է» շարժման մասին Նաիրան տեղեկացել է համացանցից։ Վերջինս մանրամասնում է՝ դրա շրջանակներում հնարավորություն է ունեցել իր ստեղծած գյուտի մասին խոսել: Թեև նա չի ցանկանում բացահայտել գյուտի անվանումը, սակայն ասում է՝ այն վերաբերում է մեկանգամյա օգտագործման մի ապրանքի արտադրության, որը նաև մաքրություն է ապահովելու:
«Շարժման շրջանակներում տեղի ունեցած դասընթացի ավարտից հետո ինձ հետ կապվեց Լոռու մարզպետը, ասաց՝ կարող եմ դիմել, որ գյուտի իրականացումը ռեալիզացնենք։ Հույս ունեմ, որ կկարողանանք իրականացնել այն, և Հայաստանի անունը համաշխարհային հարթակներում կհայտնվի։ Ընդհանուր առմամբ մեծ բավականություն ստացա դասընթացի մասնակցությունից»,- իր տպավորություններով է կիսվում Նաիրան:
55-ամյա կինը շեշտում է՝ կրթությունն է հաջողության հասնելու հիմնաքարը․ «Կարծում եմ՝ կրթությունը ապահովում է նաև մարդու սոցիալական վիճակը, աշխատաշուկայի պահանջարկը, ինքնազարգացման հնարավորություն է տալիս։ Հիմա կրթվելը շատ հեշտ է, լայն հնարավորություններ կան՝ օնլայն, օֆլայն և այլն։ Մարդը կարող է վերցնել այն, ինչ իրեն ավելի է հետաքրքրում»։
Կրթության հետևից գնացող կինը մեծ ուշադրություն է դարձրել «կրթաշղթա» բառին, քանի որ, ըստ նրա, այն ենթադրում է շարունակականություն կրթվելու առումով։